فرشت المصلية بعد ما البنات ناموا وفضلت أدعي ربنا كتير أوي، دعيته إنه ينجينا إكرامًا للست أمهم التقية النقية، دعيته بأعمالها الصالحة وإنه يكرمها بعد موتها في بناتها، دعيت وأنا ببكي بحرقة شديدة أوي، وفي النهاية نمت وحسيت بزينب بطبطب عليا، شوفت وشها أبيض ومبتسمة بطريقة جميلة أوي.. ـ زينب أنتي عايشة؟! ابتسمت ومردتش.. ـ زينب البنات بتحصلهم حاجات غريبة، تعرفي تساعديني؟؟
وقتها شاورت، شاورت قدامها، بصيت ولمحت واحدة ست شكلها مبهدل، وانتهى الحلم، صحيت وأنا هتجنن مش فاهم، بس بعد تفكير طويل افتكرت، دي ست من اللي كانوا موجودين يوم العزاء، صحيت أسيل بسرعة وبدأت اسألها بانفعال عن الستات المبهدلين اللي كانوا بيسلموا عليهم يوم العزاء، وبعد محايلة طويلة افتكرت وقالت: ـ دي الست اللي ماما وطنط آية بيروحوا يدوها فلوس..
أنا أعرف آية صاحبة مراتي، لازم أروح وأفهم القصة، تاني يوم روحت في زيارة مفاجئة لشقة زوج آية، كنت أعرفه لأني شوفته مرتين، اتفاجئ بزيارتي بس رحب بيا جدًا، طلبت منه زوجته تقعد معانا في القعدة ضروري، والراجل رغم استغرابه وافق، وحكتلهم كل حاجة، حكيت وأنا مقهور، خايف، قلقان.. جوزها بصلها وقالها: ـ مين الستات دول يا آية؟! ـ دول عاملات نظافة تعرفهم زينب الله يرحمها، وكانت مخصصة راتب ألف جنيه كل شهر لكل واحدة منهم، كانت كل شهر بتيجي تلم مننا الفلوس وتديلهم، وبقالها تقريبًا تلت سنين ملتزمة بالموضوع ده..
وقتها افتكرت، افتكرت لما زينب استأذنت مني إنها هتعمل خير بمصروف الألفين جنيه اللي بتاخدهم مني شهريًا برة مصروف البيت وأنا وافقت، ست عظيمة كانت مخصصة مصروفها كله لناس محتاجة.. بصيت لزوج آية وقلت: ـ بس أنا برضه مش فاهم!! طبطب عليا وقال: ـ بس أنا فهمت.. ـ فهمني أرجوك..
ـ واضح إن فيه حد عامل لبناتك سحر شديد والعياذ بالله ومن زمان أوي، بس السحر ضرره مرفوع بفضل صدقات مراتك، الصدقة اللي بترفع أعظم البلاء، وفضل مرفوع سنين طويلة من غير ما يقع لحد ما ماتت مراتك ووقفت الصدقة، ومراتك لما جتلك في الحلم كانت بتقولك إن الحل إنك تكمل وتطلع صدقات للستات من تاني.. ومقدرتش أمسك نفسي من البكاء حتى قدام آية، بكيت كتير أوي، أد أيه مراتي كانت عظيمة، ست منها لربنا على طول، في دنيتي وجودها مانع ضرر كبير، وحتى بعد موتها بتساعدني بفضل الله، وقتها كمل الراجل كلامه وقال:
ـ عامة أحنا هناخد البنات لمعالج كويس ونشوف قصة السحر ده، بس كمل الصدقة بتاعت مراتك متوقفهاش أبدًا.. والغريب إن كلامه كان صحيح، وفضلت أسبوع متبهدل عند شيخ بس ربنا أتم شفاء بناتي على إيديه في الآخر، وقالي إن السحر معمول من زمان أوي وإن الست الوحشة دي هي خادمة السحر، وإنه استغرب ازاي مفعوله بدأ الأيام دي بس.. بس أنا كنت عارف، صدقة مراتي كانت رافعة عننا بلاء عظيم، صدقة مراتي عملت معجزة في بيتي لمدة تلت سنين، وقتها افتكرت كل حديث عن الصدقة وإطعام الطعام، افتكرت كل شخص هيندم يوم القيامة ويقول: [فَأَصَّدَّقَ وَأَكُن مِّنَ الصَّالِحِينَ] سورة المنافقون
وازاي إن الندم مش هيكون على عبادة مهدورة أكتر من قلة الصدقات لأنهم شافوا ازاي يوم القيامة أجرها عظيم وازاي بتحمي من جهنم، وازاي بتطفئ غضب الرب، وازاي بتحمي من بلاء الدنيا، شكرًا يا زينب، وشكرًا لكل ست عايشة ترضي زوجها وبيتها وتعمل الخير لوجه الله، وشكرًا لكل شخص بيطلع صدقة لوجه الله وهو مش عارف إنه بيعمل أعظم الأعمال عند الله..
[مَّثَلُ الَّذِينَ يُنفِقُونَ أَمْوَالَهُمْ فِي سَبِيلِ اللَّهِ كَمَثَلِ حَبَّةٍ أَنبَتَتْ سَبْعَ سَنَابِلَ فِي كُلِّ سُنبُلَةٍ مِّائَةُ حَبَّةٍ وَاللَّهُ يُضَاعِفُ لِمَن يَشَاءُ وَاللَّهُ وَاسِعٌ عَلِيمٌ الَّذِينَ يُنفِقُونَ أَمْوَالَهُمْ فِي سَبِيلِ اللَّهِ ثُمَّ لَا يُتْبِعُونَ مَا أَنفَقُوا مَنًّا وَلَا أَذًى لَّهُمْ أَجْرُهُمْ عِندَ رَبِّهِمْ وَلَا خَوْفٌ عَلَيْهِمْ وَلَا هُمْ يَحْزَنُونَ] سورة البقرة بقلم/ أحمد محمود شرقاوي
